تابعنا على ...                  
الحياة والدراسة في ألمانيا
تقدّم لخدماتنا...

التجربة رقم 9   |   كل التجارب


اضف تجربتك في..

ملاحظة:
لكي يتم نشر تجربتك لا بد أن تكون باللغة العربية, وتذكر كلما كانت الكتابة أقرب للفصحى كما كان شريحة المستفيدين منها أوسع.

في أي عام كانت تجربتك؟


تجربتك كانت في..

في أية مدينة كانت تجربتك؟


اختر باباً مناسباً لتجربتك مما يلي



اكتب عنواناً معبراً عن تجربتك




إضافة التجربة  +
9

الفحص الوطني الأول بدراسة الطب (Physikum) في ألمانيا

02.06.2016  |  السنة التحضيرية Studienkolleg  |  المشاهدات    8544
السنة : ٢٠١٦
المكان : داخل ألمانيا
المدينة : Dresden
حاولت كون صادق بكلشي وانو حطكون بالجو العام للفحص ودراسة الطب بشكل عام.
البوست مفهوم 100% لأي شخص بلش دراسة طب بالمانيا
ومفهوم بنسبة 80% للأشخاص يلي لسا مابلشت , لانو في بعض الشغلات صعب الواحد يعرفا قبل ما يبلش دراسة.

الفحص الوطني الأول بدراسة الطب (Physikum)
بهل المقالة رح احكي بأدق التفاصيل عن فحص الفيزيكوم وكل مايتعلق فيه بشكل خاص وبدراسة الطب بشكل عام
اول شي انا اسمي فارس حسين بدرس طب بجامعة دريزدن.
مبارحة خلصت فحصي الفيزيكوم :D
الموضوع رح يترتب بهل الطريقة :
1- مقدمة
2- نظام تعليم الطب في المانيا
3- شو هو فحص الفيزيكوم
4- سير الفحص والفحص الشفهي
5- التحضير للفحص
6- نصائح شخصية للتحضير للفحص ودراسة الطب بشكل عام
7- تجربتي الشخصية
8- تجارب متعددة
9- خاتمة
نبلش :
1- المقدمة :
---------------
دراسة الطب بالمانيا تعتبر من اصعب الفروعة واكترها تطلباً للدراسة والجهد والتعب والسهر.
إذا كنت عم تقرا هل البوست وانت لسا مابلشت طب , فـ نصيحة ماتدخل طب غير تكون مقتنع مليون بالمية بالطب, وتكون بتحب الطب , وعرفان انو هاد الطريق صعب صعب صعب.
دراسة الطب وخصوصي اول سنتين , رح تدمر حياتك كلياً , رح تنهيك ومارح تتركلك أي فرصة تستمتع بحياتك. (وجب التنبيه يعني)
انا شخصياً ندمان انو دخلت طب, ولو بيرجع الزمن لورا بدخل فرع ثاني بحبو ويكون خفيف نظيف يخليني ادرس واستمتع بحياتي :)
2- نظام الطب في المانيا :
--------------------------------------
بالمانيا في نظامين للطب , النظام الجديد والنظام القديم
النظام القديم هو يلي فيو فيزيكوم وهو رح يكون محور موضوعنا
دراسة الطب هي عباراة عن 6 سنين مقسومة إلى :
- المرحلة القبل سريرية (Vorklinik) ومدتها سنتين , تنتهي بفحص الفيزيكوم يلي رح نحكي عليه
- المرحلة السريرية (Klinik) ومدتها 4 سنوات (3 سنوات دراسة + 1 سنة عملي) وتنتهي بالحفص الوطني الأخير
المرحلة قبل السريرية يلي هي قبل الفيزيكوم, بيتعلم فيها الواحد مواد مثل التشريح والكيمياء الحيوية والفيزيولجي والهيتسولوجي وهل القصص.
بتنتهي بفحص الفيزيكوم, بهل الفحص بتقدم فيه كلشي درستو خلال هل السنتين !
نصيحة اخوية :
إذا انت مابتحسن تدرس كل يوم (كل يوم هااا) 5 ساعات على الأقل (على الأقل ها) فلا تقرب عل الطب ابداً.
3- الفيزيكوم :
----------------
فحص الفيزيكوم مثل ما قلنا فوق هو مرحلة العبور بين المرحلة قبل السريرية والمرحلة السريرية,
بفحص الفيزيكوم بيتطلب منك أنك تكون تعرف كلشي درستو خلال السنتين الماضيات.
لازم تكون جاهز تنتقل من المرحلة قبل السريرية , ومرحلة أنك تتعلم الجسم كـ جسم سليم خالي من الأمراض, إلى مرحلة تقدر تتعامل مع الأمراض ومع المرضى وهيك.
شروط التأهل لفحص الفيزيكوم :
1- أنك تكون ناجح بكل المواد يلي قدمتون بالسنتين , يعني بالألماني أنك تكون Scheinfrei
المواد يلي بتدرسون بأول سنتين هنن :
1.Physik für Mediziner
2.Chemie für Mediziner
3.Biologie für Mediziner
4.Physiologie
5.Biochemie/Molekularbiologie
6.makroskopische Anatomie
7.mikroskopische Anatomie
8.medizinische Psychologie und medizinische Soziologie
9.Praktikum zur Einführung in die klinische Medizin
10.Berufsfelderkundung
11.Terminologie
12. ein Wahlfach
رقم 9 هي مدخل للمرحلة السريرية, مادة صغيرة بتتعلمو فيها كيف تقيسو ضغط وكيف تسمعو صوت القلب وهل الحركات
رقم 10 هي مادة صغيرة عباراة عن كتابة تقرير عن مستوصف او مشفى او شي شغلة
رقم 11 هي مصطلحات طبية
رقم 12 هي مادة اختيارية إجبارية, بيختارها الطالب من بين عدة مواد وبقدمها, انا شخصاً اخترت اللغة الإنكليزية.
هدول الفحوصة لازم تكون مخلصون كلون ونجحان فيون قبل فحص الفيزيكوم, وهون بتكمن إحدى صعوبات فحص الفيزيكوم والضغط يلي فيو.
انت لا سمح الله إذا رسبت بأي مادة من المواد وخصوصي مواد الفصل الرابع ( قبل الفيزيكوم مباشرة) مابعود عندك وقت تتدارك الموضوع وبصير لازم تأجل الفيزيكوم ست شهور بس لحتى تنجح المواد وتقدم الفحص بعدين.
2- أنك تكون عامل Pflegepraktikum لمدة 3 شهور بمستشفى.
3- أنك تكون حاصل على دورة إسعافات أولية مدتها لا تقل عن سنتين
4- شهادة بكلوريا مترجمة مصدقة الماني
5- شغلة كتير مهمة بالنسبة إلنا السوريين وهي تعديل شهادتك البكلوريا تبع اليوني اسيست, هادا لازم تحتفظ فيو انت , انا تعذب كتير للقيتو (هي الورقة يلي مكتوب عليها انو شهادة البكلوريا السورية تبعك تعادل مثلاً 1.5 بالنظام الألماني)
6- إخراج قيد
منجي على الفحص
فحص الفيزيكوم بيتألف من قسمين :
1- القسم الكتابي: عباراة عن 320 سؤال اختر إجابة صحيحة , مقسمة على يومين
كل يوم 160 سؤال.
لازم تجاوب على 192 سؤال صح (نسبة 60%) لحتى تنجح بالفحص
2- القسم الشفهي: وهي عباراة عن مقابلة شفهية مع دكاترة بمواد التشريح والكيميا الحيوية والفيزيولجي.
تقسيم الإسئلة بالقسم الكتابي :
20% Biochemie
20% Anatomie
20% Physiologie
20% Psychologie
5% Histologie
5% Chemie
5% Biologie
5% Physik
باليوم الأول بتقدم مواد الفيزيولوجي والبيوشيمي والفيزيا والكيميا
باليوم الثاني بتقدم مواد التشريح والهيستولوجي والبيولوجي وعلم النفس.
-الفحص يوجد مرتين بالسنة بآخر شهر آب , وآخر شهر آذار.
- إذا رسبت بالشفهي ونجخت بالكتابي او العكس, رح تعيد بس الفحص يلي رسبت فيو , ومارح تكون مضطر تعيد كلشي.
4- سير الفحص والفحص الشفهي :
----------------------------------
الفحص الكتابي :
أول يوم بكون يوم الثلاثاء , ببلش الفحص الساعة 9 وبينتهي الساعة 13
160 سؤال مقسمة كالتالي :
60 سؤال كيميا حيوية (20%)
60 سؤال فيزيولجيا (20%)
20 سؤال كيميا (5%)
و20 سؤال فيزيا (5%)
ثاني يوم بكون الأربعا, كمان الفحص 4 ساعات من الـ 9 لل1
160 سؤال مقسمة :
60 سؤال أناتومي (20%)
60 سؤال علم نفس (20%)
20 سؤال بيولجي (5%)
20 سؤال هسيتولوجي (5%)
وانت بعد الفحص بتاخود دفترة الإسئلة معك عل البيت وبتسلم بس ورقة الإجابة.
حلاوة فحص الفيزيكوم أنو الدكاترة بنزلو الحلول بعد الفحص مباشرة , وبهل الحالة فيك تتأكد من أجوبتك وتاخود نتيجة تقريبة.
غالباً النتيجة بتكون صحيحة , او ممكن يكون في زيادة او نقصان بمقدار 2% لأ اكتر.
اما فحص الشفهي , هادا انا بسميه فحص الحظوظ , هون الحظ كتير بيلعب دور
فحص الشفهي بكون بعد الكتابي , ابتداء من بعد 5 أيام إلى بعد 45 يوم
يلي حظو بشع , بيطلعلو فحص الشفهي بعد 5 ايام من فحص الكتابي وهيك مابكون معو وقت لحتى يحضر
يلي حظو بشع كمان , بيطلعلو فحص الشفهي آخر آخر الشي , يعين بعد شهر ونص من الكتابي , وهيك بكون الزلمة طق من الملل وماعاد إلو خلق يدرس ابداً وبتكون راحت العطلة
يلي حظو حلو هو يلي بيطلعلو فحص الشفهي بعد بإسبوعين من فحص الكتابي , هيك بتكون معك وقت منيح لحتى تحضر برياحة.
فحص الشفهي هو عباراة عن 3 مواد + هيستولوجي
الفحص بطول كمان شي 4 ساعات
وبتعمل الفحص مع 3 طلاب تانيين
اول شي بتاخود نسيجين عل المجهز لازم تعرفون وتسميون وترسمون (Präparate)
بعدين ببلش الفحص
اول شي اناتومي عل الجثة , بيسألك شوية إسئلة
بعدين فيزيلوجي وبيوشيمي. بصير بينك وبين الدكتور محادثة صغيرة بيسألك اسئلة بتجاوب وهكذا
كل مادة من المواد فحصها ربع ساعة ,
يعني بالمجموع فحصك الشفهي هو عباراة عن ساعة
بس بما أنو انتو 4 طلاب عم تقدمو سوا , فبدك تستنى غيرك دائماً ولذلك بطول الفحص 4 ساعات.
5- التحضير للفحص :
-----------------------
يمكن هي أهم فقرة بالموضوع كلو , وهي كيفية التحضير لفحص الفيزيكوم !
أول ما تبلشو دراسة طب , رح يكون الفيزيكوم مثل كابوس على قلوبكون , ورح تضلو تسمعو فيه وتخافو ,وإذا طالب الطب بدو يتخيل الشيطان ,, رح يتخيلو على هيأة فحص فيزيكوم
بحب طمنكون انو فحص الفيزيكوم مانو كل هل الشي صعب مثل ما الناس بتصورو او مثل ما طلاب السنوات الأعلى بصورولكون ياه.
مثل ما حكينا اول شي ,, الشرط الأساسي لإنك تدخل طب أنك تكون قادر تدرس يومياً أقل شي 5 ساعات
هلق منجي لكيفية الدراسة :
أهم شي تعرفو انو الدراسة لفحص الفيزيكوم الكتابي , غير الدراسة لفحص الفيزيكوم الشفهي
فحص الكتابي هو عباراة عن صح أو خطأ , وبالتالي لازم تدرس كتير تفاصيل صغيرة وأرقام لحتى تعرف تجاوب على الإسئلة
بينما فحص الشفهي هو عباراة عن معرفة سطحية بالمواد الثلاثة الكبيرة (تشريح - كيميا حيوية - فيزيولجي) يعني لازم تركز عل المصطلحات , لازم تفهم تماماً وتعرف تربط بين الأمور.
الدراسة هون فيني قسمها انا لـ 3 أقسام :
رح نحكي عن التحضير للفحص الكتابي :
1- دراسة من الكتب
2- التمرن على إسئلة الدورات , بالألماني أنك تعمل Kreuzen
3- الدراسة مع مجموعة , Lerngruppe
4- وضع برنامج
1- الكتب :
الطريقة الأفضل والأحسن والأوفر هي الدراسة من سلسلة من هل السلسلتين من الكتب :
1-Endspurt
2- Medileran
هدول السلسلة من الكتب (بتشوفو صورهم تحت) هنن عباراة عن كتب مكتوبة خصيصاً كرمال الفيزيكوم , ومأخدوين من محتوى الفيزيكوم يلي بتعرضوا الـLandesprüfungsamt
اول سلسلة وهي سلسلتي المفضلة انا , هي سلسلة الإيند شبورت , هنن عباراة عن مجموعة من الكتب يمكن بيطلعلو عشر كتب , كل كتاب شي 80 صفحة , بطريقة سلسلة وحلوة كتير وأحلى شي بهل الكتب أنو اسئلة الفيزيكوم يلي جاية بالدورات الماضية بتكون معلمة بالأصفر , فـ انت وقت عم تدرس من هل الكتب بتكون بنفس الوقت عم تحل أسئلة الدورات السابقة وعم تتدرب عليها وبتعرف تماماً كيف رح يجي السؤال بالفحص.
سهر السلسلة كاملة جديدة تقريباً 185 يورو , بعرف أنها شوي غالية , بس انا اشتريتها وبنصحكون كمان تشتروها لأنو عنجد مفيدة كتير.
أما السلسلة الثانية وهي سلسلة الميدي ليرن ,شخصياً انا ماني من شبيحة الميدي ليرن وبشوفها سلسلة للأطفال وكتير فيها معلومات قليلة مقارنة بالإيند شبورت, ومابنصح فيها بصراحة , بس انا بعرف ناس درسوا منها ونجحوا بالفحص.
في ناس بعرفهم مابحبو يدرسو من هل السلسلتين , لأنو هل السلسلتين المعلومات فيون مدحوشة دحش ومكدسة تكديس , وغالباً بكون مافيون شرح كتير, فـ بتروح هي العالم بتدرس من الأطالس او الكتب الكبيرة , وهادا الشي خطير كتير كتير
إذا كنت شاطر كتير وذكي كتير , ودرست كلشي بالأطالس ,, حلال عليك ممكن تجيب كتير علامة عالية بالفيزيكوم
بس بنفس الوقت ممكن تضيع , لأنو الأطالس كتير فيون معلومات مابيلزموك للفيزيكوم ابداً ابداً , وبالتالي مابتعود بتلحق ابداً وبتصير المعلومات تفوت ببعضا لأنو كمية المعلومات المطلوبة للفيزيكوم هائلة جداً.
انا درست من الإيند شبورت , بس درستون دراسة كتير منيحة (لعنت أبوون يعني) وبالنهاية جبت بالفحص 82% وهي علامة جيدة جداً بالفحص لأنو متوسط العلامات السنة الماضية كان 69%.
فـ الإيند شبورت كافي كافي كافي للنجاح بالفيزيكوم.
منجي هلق لأهم نقطة بالموضوع كلو ,, أهم نقطة على الإطلاق وهون سمحولي فش خلقي واحكي:
اول ما بتدخل عل الجامعة , بيجو الألمان بيشرحولك وين الكلية وين المكتبة ووين الحمامات , وإذا بدك تروح تشتكي وين بتروح , وشو رقم الإسعاف بالكلية ورقم الشرطة ومدري شو !
بس مافي حدا بيجي بقلك شو تدرس , ولا بيعطيك معلومة عليها القيمة.
وطبعاً نفس الشي ينطبق على السوريين مع الأسف ,,, يعني اكيد كلكون بتعرفو الغيرة بين السوريين بالجامعة وتخباية الأمور على بعض وهل المشاكل يلي ماعاد نخلص منها
فـ نصيحة يا شباب :
من السنة الأولى درسوا من الإيند شبورت
من السنة الأولى درسوا من الإيند شبورت
من السنة الأولى درسوا من الإيند شبورت
هي كتبتها 3 مرات لأنو هي أهم شغلة وانا كتير انضربت بصراحة لأنو بالسنة الأولى ما درست من الإيند شبورت,
بالسنة الأولى منكون كلنا ضايعين , ومنقعد مندرس ملخص هاد وتلخيص هاد وكتاب هاد
خلي دراستكون مربوطة دائماً بالإيند شبورت
احياناً دراسة الإيند شبورت لفحص من فحوصة الجامعة مابتكون كافية , مثل فحص الكيميا الحيوية عنا بالجامعة وبالتالي بالإضافة للإيند الشبورت بجي بدرس انا من كتاب ثاني .
بس دائماً وابداً , خلي الإيند شبورت معيار دراستك ,وخليه دائماً رفيقك بالدراسة.
الفقرة يلي بالإيند شبورت مشروحة كتير أو معلم عليها بالأصفر (يعني انو هي اسئلة دورات) هي درسا كتير منيح , والفقرة يلي ماشي عليها الإيند شبورت بسرعة , ما تركز عليها كتير
لأنو بالنهاية الإيند شبورت بدك تدرسون يعني بدك تدرسون
بقى درسون خلال السنتين على مهلك وبرواق , أحسن ما تجي قبل فحص الفيزيكوم بشهرين بتطلع هيك بتلاقي عندك 10 كتب إيند شبورت لازم تخلصون !
هي هي أهم نصيحة بحسن أعطيك ياها كـ طالب مخلص فيزيكوم.
2- التمرن على الدورات بمعنى آخر Kreuzen
الموقع الأفضل والأحسن هو هادا الموقع .examenonline.thieme.de
هادا موقع عاملتو شركة Thieme , وبتحط عليها اسئلة دورات الفيزيكوم من عام 1999 لحد الآن , اكتر من 12 ألف سؤال, وكل سؤال محطوط عليه الحلول والشرح وليش هي الإجابة غلط وليش هي الإجابة صح , وفي فيديويات شرح لكل المواد يعني ببساطة, هادا الموقع هو عباراة عن بحر من المعلومات.
حل الدورات السابقة كتير كتير مهم , وغالباً 25% من إسئلة الفيزيكوم يلي بتجي بالفحص هي بتكون اسئلة دورات, وكمان حتى تتعرف على الإسئلة وكيف بتجي.
الموقع هادا بمصاري , بس غالباً الجامعات (مثل جامعتي) بتعطي دخول مجاني للطلاب.
لا تستقلو ابداً بالـKreuzen لأنو كتير مفيد , ومانو متعب , يعني انا وقت بخلص دراستي هيك الساعة 9 المسا مثلاً , ومابعود بكون إلي خلق انو ادرس كمان
بفتح الموقع وبصير بحل كم سؤال , ومابحس عل الوقت ومابمل , وبكون عم اعمل ريفريش لمعلوماتي.
انا غلطت غلط , وماني رايدكون تغلطو فيه , أنو انا بلشت اعمل Kreuzen وقت بلشت حضر للفيزيكوم , يعني من شي شهرين تقريباً.
انت فيك تبلش تحل إسئلة دورات فيزيكوم وانت بالفصل الأول .
مثلاً عندك بالجامعة فحص اناتوني , وانت عم تدرس اناتومي, فتاح الموقع وحل شوية إسئلة دورات للأناتومي.
- الموقع فيو كم هائل من الإسئلة 12000 سؤال, واكيد مارح تلحق تعملون كلون لذلك بلش دائماً من فحص 2008 وانت ماشي, يعني تقريباً شي 6000 سؤال
- من المهم انك ما تعمل Kreuzen بعد الدراسة مباشرة , لأنو هيك بتكون عم تغش حالك ورح تجيب علامة كتير عالية.
انا درست فقرة اليوم , بعمل Kreuzen لهل الفقرة ثاني يوم المسا.
3- الدراسة مع مجموعة او Lerngruppe
بالنسبة إلنا كأجانب من المهم جداً أنك تلاقي مجموعة تدرس معها , تعملو هيك دائرة وتبلشو تسمعوا لبعضكون وتتبادلو المعلومات, ويفضل يكونو المان
اولاً انت بتستفاد من اللغة , تانياً بتقارن حالك مع رفقاتك وبتشوف كيف ماشي , وتالثاً وأهم شي أنك بتكسر الرتم شوي ومابتمل
لأنو اكبر عدو إلك بالفيزيكوم هو الملل والملل والملل.
انا ابتداء من الفصل الرابع ( يعني من شي 6 شهور تقريباً) مافي يوم درست فيه أقل من 7 ساعات , كانت تمضى أسابيع ما اطلع فيها من البيت غير للجامعة او للمكتبة.
بتوصل بالنهاية قبل الفيزيكوم ,,, بتحس حالك رح تموت , رح تطق من الملل والتعب والإرهاق.
مشان هيك وقت بتدرس مع رفقاتك , بتضحكو بتمزحو بتتبادلو المعلومات بصوت عالي
المعلومات بتركز بذهنك هي اولاً ,وثانياً بتغير شكل شوي.
فـ يفضل دائماً تدرس مع غروب احسن ما تدرس لحالك
4- وضع برنامج :
كتير مهم انك تحط برنامج عل المدى الطويل وتلتزم فيه ,
يعني انا كنت بعرف شو بدي ادرس بعد 50 يوم, واهم شي انك تلتزم بالبرنامج.
مندون برنامج وخطة , صعب كتير يمشي حالك بالفيزيكوم.
في شوية نقاط إضافية حابب احكيها عن الدراسة :
- مادة التشريح لازم بالإضافة للإيند شبورت , تشوف صور من الأطالس, لانو الصور بالإيند شبورت قليلة نوعاً ما.
- الله يخليكون يا شباب لا تكبوا مواد الفيزيا والكيميا والبيولوجي
أغلب السوريين يلي انا بعرفون , مابيدرسوا هي المواد الصغيرة يلي عليها بس 5% من الفحص.
وبقلك ايييه ... كلها 5 % مابدي ياها.
بس هل الشي غلط كبير, لأنو هل الـ 3 مواد مع بعضها بالإضافة للهيستو , عم تكون بمجموع مادة ضخمة مثل البيوشيمي.
انا درستون ومانسيتون ابداً ورفعولي علامتي كتير , حتى اني جبت علامة تامة بالكيميا بالفيزيكوم والفيزيا كان عندي غلط واحد بس.
فـ الله يخليكون لا تطنشو هل المواد وتكبون , لأنو بتروحو علامات كتير.
- مادة علم النفس او الـPsychologie بتعمل 20% من الفيزيكوم , وهي نسبة كتير عالية ومضرة بالنسبة لإلنا نحنا الأجانب, بالمقابل هي مفيدة كتير للألمان وتعتبر هدية .
بالنسبة للأجنبي علم النفس صعب كتير لأنو اللغة صعبة ,
للأسف هل الشي مافينا نغيرو , لذلك حاولو تدرسو هي المادة مع واحد الماني , يشرحلكون ياها بطريقة حلوة وخفيفة , وحلو اكبر قدر ممكن من إسئلة الدورات.
بصراحة هي المادة هي نقطة ضعف الأجنبي بالفيزيكوم.
اما التحضير للفحص الشفهي :
التحضير لهل الفحص بكون بأنك تدرس مع غروب الماني حتى تقوي لغتك مثل ما حكينا فوق, بالإضافة انو كل الطلاب يلي اكبر منك بحطو المواضيع يلي بتنسأل غالباً من البروفسورية
انت طلعلك البروفسور الفلاني , بتفتح على موقع الطلاب وبتشوف شو كاتبين عن هل البروفسور
هدول اسمون Altprotokolle وبتحضرون شوي شوي وبيمشي حالك
انا بصراحة كنت خايف من فحص الشفهي اكتر بكتير من فحص الكتابي, كوني انا اجنبي , وكون حظي بهوي
بس طلع فحص الشفهي كتير سهل مقارنة بالكتابي
بالفحص الشفهي مو مطلوب منك ابداً انك تعرف شغلات بأصغر تفصيل , بس مطلوب منك تحسسوا للدكتور انو انت فهمان المادة وعرفان وين الله حاطك فيها :)
6- نصائح لدراسة الطب بشكل عام :
----------------------------------------
بعد ما حكينا عن طريقة التحضير للفيزيكوم وكيف لازم تدرس , رح احكي شوي عن دراسة الطب بشكل عام
1- انت اول ما تبلش دراسة طب , رح تحس حالك غبي , مابتفهم شي , مانك عرفان وين الله حاطك , رح تكتئب وتبكي وتعصب وتدايق
رح تشوف رفقاتك الألمان كل واحد منون عندو شي 50 كتاب و50 دفتر و100 ملخص وانت يادوبك عم تفهم عل الدكتور شو عم يحكي بالالماني وبالزور عم تعرف تلفظ المصطلحات اللاتينية المعتة.
لا تاكول هم .. هادا كلو طبيعي اول فترة, وإذا ما حسيت هيك اول فترة ف معناها انت عم تعمل شي غلط او في شي مانو مزبوط.
قد ما تعذبتو أول الدراسة , هادا كلو طبيعي , شوي شوي مع الوقت بتتحسنو كتير وبيمشي الحال
2- توقف عن التفكير باللغة العربية.
اول ما بتبلش الدراسة وكون لغتنا مابتكون لسا كتير تمام , منضطر نترجم المصطلحات للعربي لحتى نفهمها.
هادا الشي أول الدراسة مو مشكلة , يعني انا اول فصل كنت انا وغوغل ترانزليت أعز صحاب.
بس بعدين لازم يجي مرحلة , تقول فيها بينك وبين حالك , انو انا خلص , لازم بطل استعمل اللغة العربية ابداً ولازم بلش اقرا بالالماني ادرس بالالماني واتعلم بالالماني
بفترة الإنتقال من العربي للألماني بطريقة التفكير , رح تلاقي صعوبة كتير ورح تشوف انو العربي أسهلك , بس على المدى البعيد الألماني احسن بكتير.
اقرا الماني , فكر الماني , جاوب الماني
احسن مما تقرا الماني , تفكر عربي , ترجع تقلب الفكرة الماني , وبعدين تجاوب الماني :)
3- لاقي شلة المانية تضرب صحبة معها وتتبادل المعلومات معها وتحسن لغتك
4- ابتعد عن السوريين , وماتعمل شلل سورية بالجامعة لأنو هيك لغتك الالمانية رح تتراجع ومارح تحسن تتقدم علمياً.
انا كتير مبسوط مع رفقاتي السوريين بالجامعة , وكتير منحب بعضنا ومنساعد بعضنا , بس كل واحد منا إلو رفقاتو , إلو شلتو , إلو دراستو, هيك أحسن إلك وإلون.
5- رح يجيك بين الفصول عطل طويلة , عطل وانبسط , بس لاتنسى دراستك وحاول دائماً تضل على تواصل مع الدراسة, لأنو وقت الفيزيكوم كتير رح يكون عليك ضغط دراسة, فـ احسن انك تدرس بالعطلة وتخفف عليك الضغط لأنو بالنهاية انت بدك تدرسون غصبن عنك , فدرسون انت ومبسوط ومروق احسن ما تدرسون وانت عم تبكي وتحت الضغط.
6- واهم نصيحة كالعادة :
من السنة الأولى درسوا من الإيند شبورت
من السنة الأولى درسوا من الإيند شبورت
من السنة الأولى درسوا من الإيند شبورت ههههه
7- تجربتي الشخصية :
----------------------
بعد كل هل الحكي رح سمعكون تجربتي الشخصية :
انا دخلت عل الجامعة بعد ما درست 5 شهور لغة بس.
كانت كتير كتير صعبة البداية , ماكنت بعرف شو يعني سيمينار ولا شو يعني براكتيكوم , كانت دريزدن مدينة جديدة مابعرف فيها غير شخص او شخصين.
اول فصل كان كارثي , كانت أسوء أيام حياتي.
بتروح عل المحاضرة بتلاقي الألمان نازلين كتابة ورا الدكتور وانت ماعم تفهم ولا حرف من يلي عم يحكيه.
كانت تجيني كآبة وقت شوف هل الألمان وترتيبون وكتبون وانا مابعرف شي.
اجي ادرس المحاضرة تطول معي 7 ساعات وبالأخير ماتندرس , وإذا اندرست تاني يوم انساها
كيف اول سمستر مضي ونجحت كل الفحوصة ,,, عنجد مابعرف.
بالسمستر التاني تحسن الوضع الشوي وفهمت كيف تمشي الأمور وتحسنت لغتي وكان سمستر جيد نوعاً ما.
بالسمستر التالت والرابع تحسن الوضع كتير , وصارت الدراسة بالالماني اسهل من الدراسة بالعربي وتأقلمت عل الجو وعل المدينة.
بالنسبة للفيزيكوم انا بلشت حضر للفحص ابتداء من السمستر الرابع.
بالسمستر الرابع عنا مادتين وهنن الكيمياء الحيوية والفيزيولجيا وبنفس الوقت بلشت ادرس معها اناتومي من الفصل الأول , لأنو انا كلشي درستو اناتومي اول سنة نسيتو تماماً لأنو ماكنت عم ادرس مزبوط وكنت ضعيف كتير.
خلص الفصل الرابع وكنت مخلص الكيميا الحيوية والفيزيلوجيا وربع الأناتومي
كان بين نهاية الفصل الربع وفحص الفيزيكوم 55 يوم
اغلبها راح على دراسة الاناتومي وعلم النفس , واكيد مالازم الواحد ينسى هي المواد الصغيرة مثل الفيزيا والكيميا.
بالنهاية مشي حال والحمدالله تيسرت الأمور ونجحنا بالفحص
8- تجارب متعددة:
------------------
لاحظت من البوست الماضي انو في كتير ناس بتسأل عن الفيزيكوم وهي بتكون دارسة بسوريا
لذلك رح احكيلكون عن شوية شباب رفقاتي وتجاربهم بالفيزيكوم.
في سوريين كتير درسوا سنتين او ثلاثة بسوريا واجو لالماني عملوا تعديل , وصار مطلوب منون يعملو فحص الفيزيكوم.
مابدي اكذب عليكون .. هل الشي كتير صعب وبدو وقت وجهد
انك تدرس اسماء العضلات كلها بالعربي والعضلة الباسطة المنبسطة المفتوحة والعصب الكعبري الفخدي اليساري المدري شو !
بعدين تجي عل الألماني , هل الشي كتير صعب وكتير رح يتلبك الواحد
عندي صديقي كان دارس 3 سنين طب بالشام , ولحد الآن ما حسن يخلص من الفيزيكوم وعندو حالياً تالت محاولة (إذا رسب رح يتقلع من كل جامعات المانية )
بس للأمانة , الحق عليه مية بالمية لأنو هو ابداً ماعم يبذل جهد
في صديقة ثانية كمان نفس الحالة , بس لحد الآن ما قدمت فيزيكوم , وأجلتو , وانا بشوف هل الشي صحيح
عطوا لحالكون وقت لحتى تتعودوا عل اللغة العلمية وتقلبو تفكيركون للألماني , لأنو هل الشي بياخود وقت
وبالنهاية بعرفين شبين إخوة من حلب (الله يحميون) كمان نفس الحالة
بس ماشالله الشباب دخلوا عل السريع عل الجامعة عملوا الفيزيكوم ومن أول مرة نجحوه وهلق عم يكملو دراسة بلا أي مشكلة .
بالنهاية العملية صعبة وبدها شغل , بس إذا عنجد انت عقلك براسك وحاطط النجاح بين عيونك , مافي حدا بوقفك :)

9- خاتمة :
------------
الله يوفق الجميع يارب وانشالله هيك كلياتنا مننجح بالمانيا ومنتأقلم مع المجتمع ومنشق طريقنا فيو.


تابعنا على ...                  
عن الموقع
من نحن؟
اتصل بنا
إتفاقية الإستخدام
سياسة النشر
Impressum
أقسام الموقع
اطبع سيرتك الذاتية
المبيت ليلة الإمتحان
كــنوز المعــلومات
الأسئلة القصيرة
في ألمانيا   |   إلى ألمانيا

أصدقاؤنا