تابعنا على ...                  
الحياة والدراسة في ألمانيا
تقدّم لخدماتنا...

التجربة رقم 7   |   كل التجارب


اضف تجربتك في..

ملاحظة:
لكي يتم نشر تجربتك لا بد أن تكون باللغة العربية, وتذكر كلما كانت الكتابة أقرب للفصحى كما كان شريحة المستفيدين منها أوسع.

في أي عام كانت تجربتك؟


تجربتك كانت في..

في أية مدينة كانت تجربتك؟


اختر باباً مناسباً لتجربتك مما يلي



اكتب عنواناً معبراً عن تجربتك




إضافة التجربة  +
7

تجربتي في ألمانيا من اللغة إلى الدراسة الجامعية

29.05.2016  |  متنوعة وشاملة  |  المشاهدات    2469
السنة : 2014
المكان : داخل ألمانيا
المدينة : Berlin

رح احكي عن تجربتي الغريبة نوعا ما يلي تضمنت 4 جامعات حتى الآن .. على امل يكون فيها فائدة ومشان تتعلموا من الأشياء المنيحة اللي عملناها ومن الاخطاء يلي ارتكبناها

بداية انا دارس 3 سنين طب بشري من قبل، أول سنة درستها بجامعة حلب، وبعدها اضطريت للنقل إلى جامعة دمشق بسبب خطورة الطريق -النقل مسموح- رغم اني ما كنت اتخيل اني رح انقل.. درست السنة الثانية بدمشق على نية الإكمال فيها ولكن بعد نهاية السنة طلعت من البلد وما عاد تيسرت الرجعة، فصار لازم نبحث عن مكان آخر فنقلت على كلية طب القاهرة ودرست فيها السنة الثالثة بنجاح، ولقيت الجامعة ممتازة ونويت الإكمال فيها حتى النهاية، ولكن بالعطلة الصيفية طلعت لعند اهلي وصار الانقلاب بالقاهرة ومنعوا دخول السوريين لمصر بهداك الوقت فصرنا نفكر بألمانيا... هون بقا عملت كورس A1

دخلت ألمانيا بتاريخ 03.05.2014 وبدأت بكورس A2 يلي استمر شهرين، الحمد لله كنت متمكن منه منيح وهالشي خلاني اقدر شد بال B1 وأنهيه بشهر واحد.. هي خطوة منيحة ماني نادم عليها.. برنامج Duolingo ساعدني كتير بالمناسبة
بعتت موادي للمعادلة بدوسلدورف وعادلوا -كالعادة للطلاب اللي دون الخامسة- فصلين دراسيين

كنت ترجم المفردات دائما للانكليزي مو للعربي، هالشي كتير مفيد أولاً لأنه اللغتين اقرب لبعض وثانيا من أجل الحفاظ على المفردات الانكليزية لانو أغلب الطلاب اللي بيدرسوا بالألماني بتضعف لغتهم الانكليزية بسبب قلة الممارسة، أهم قاموس على الإطلاق هو [ انظر الرابط المرفق ]
إضافة إلى هاد الموقع الخاص بالتراكيب والمصطلحات [ انظر الرابط المرفق ]

ابتداء من مستوى B2 بنصح انه تترجموا من الألماني للألماني قدر الإمكان .. ومع الاسف اشتريت قواميس ألماني-ألماني حقها هديك الحسبة
طبعا عم قول مع الاسف لاني بعدين اكتشفت انها كلها موجودة عالنت مجانا O:) (للتفاصيل راجع هذا البوست [ انظر الرابط المرفق ] )
وفي هاد الموقع للمترادفات بالألماني [ انظر الرابط المرفق ]
كنت احضر Dragon Ball Z بالألماني وكتير ساعدني باللغة وخاصة السماعي .. انا بلاقي الكرتون كتير منيح بالبداية لتعلم اللغة

كورس B2 كالعادة أصعب من غيره ومليان معلومات، عملته لمدة 3 اشهر مع انه كان فيني خلصه بشهرين بس هاد المستوى بده إتقان منيح
----------------------
هون في شغلة مهمة لازم قولها .. خطأ ارتكبته وأذاني جدا، رح احكيه مشان الفائدة وما حدا يوقع بنفس المطب
في شهر ديسمبر 2014 حاولت التقديم على الفصل الصيفي 2015 على قبول مشروط في الفصل الدراسي الثالث في كليات الطب
كانت لغتي غير كافية وما كان عندي معرفة بطريقة التقديم ولا بعرف هالغروب ولا شو الجامعات يلي بدها تقديم عبر اوني اسيست (القائمة الموجودة في موقع اوني اسيست هي للفصل الاول بس وانا كان بدي فصل ثالث) ولا سيما اني كنت وقتها بلشان بالنقل من مدينة لمدينة ومشغول كتير
بوسط هالطوشة انعمى على قلبي وراسلت شركة أوستيو للخدمات الطلابية وافترضت انه هاد افضل حل مشان ما يروح علي الفصل وبعيننا الله على التكلفة، واتفقنا يراسلوا 7 جامعات على الفصل الثالث هم حددوها وقالوا أنه يمكن بدء الدوام فيها في الصيف، قاموا بعتوا الطلبات السبعة للاوني اسيست، وبعد فترة وصلني جواب من اوني اسيست بأن 6 طلبات من السبعة ألغيت لأنها تخص جامعات تحتاج لتقديم مباشر! وفقط الطلب السابع تحوّل إلى الجامعة المعنيّة .. وهذه الجامعة تبين لاحقا أنه ليس فيها فصل ثالث في الصيف، وحتى الطلبات الستة التي ألغيت في منها طلع بيخص جامعات كمان ما فيها فصل ثالث بالصيف من الاصل، يعني الطلبات السبعة كلها غلط والشركة طلعت معلوماتها عن الجامعات غير دقيقة بالمرة... ولما حاكيتهم ما رضيوا يرجعوا شي من الأجرة وحكوا كلام بذيء مصحوب بتهديد.
ولاحقا وانا عم قدم بالفصل الشتوي فحصت الطلبات اللي كانوا معبينها لقيتها مليانة أخطاء، واضح انو تعبئة الطلبات بتتم عالسريع ولا تدقق حتى انه المعلومات كانت متناقضة بين طلب وطلب!
هذا ما حدث.. لذلك نصيحتي لا حدا يتعامل مع شركات القبولات.. لأنو بيحكوا كلام أكبر منهم ومعلوماتهم سطحية ومانهم فاضيين يدققوا أوراقك لأنو ببساطة عندهم اوراق ألف واحد غيرك.. درس وتعلمناه، وتأملت خير للفصل الشتوي.
----------------------

نعود لمشوار اللغة ..عملت شهرين كورس C1 ثم شهرين C2 انتهوا بامتحان Goethe-C2 في شهر 2-2015
في أستاذ من معهد غوتة كان ينصح دائما بأنه العدد الأفضل لتعلم المفردات هو 20 مفردة جديدة كل يوم، لأنه هاد العدد اللي بيقدر يحفظه الدماغ بتركيز وأكتر من هيك بصير التركيز يقلّ، لذلك النصيحة هي تعلم 20 مفردة جديدة كل يوم، وليس تعلّم كل المفردات قبل الفحص بيومين مثلا ..
امتحان غوتة C2 صعب وما بنصح فيه.. نجحت بالشفهي والكتابي والسماعي وما نجحت بالقراءة، فقدمتها بالشهر اللي بعده (بامتحان غوتة C2 فيك تقدم كل قسم لحاله) وهالمرة نجحت فيه والحمد لله صارت معي شهادة غوتة C2 بفضل الله بفترة إجمالية 12 شهر، وبدأت انتظر التقديم للفصل الشتوي
خلال دراسة اللغة وخاصة بالمستويات الأخيرة استفدت جدا جدا من هذا الكتيب الصغير (بحجمه، والعظيم بقيمته :D ) الخاص بالتراكيب الألمانية (كيف تقول رأيا مخالفا، كيف تقاطع بأدب، كيف تربط الحجج ببعضها ...وهكذا) وخااااصة مشان امتحانات اللغة بقسم التعبير الكتابي والشفهي
[ انظر الرابط المرفق ]

-عملت كورس أونلاين عن الأبحاث الطبية والطب المسند للدليل EBM
-قدمت على ستاج رعاية مرضى Pflegepraktikum بال Charité .. لأنه أي طالب طب بشري ملزم يكون عامل 3 شهور من هالستاج قبل نهاية السنة الثانية
عملته بشهر 6 بس واجهت فيه صعوبة لأني ما مارست اللغة بشكل جيد من وقت ما خلصت السي2 (انقطاع 3 أشهر) وهاد كان خطأ، نصيحة لا حدا ينقطع عن ممارسة اللغة سواء بقراءة صحف عالنت أو مشاهدة نشرات اخبارية او الحكي مع حدا باستمرار.. أي انقطاع لفترة قصيرة عواقبه رح تكون سيئة وتراجع سريع

بهالفترة كنت بدأت حملة شعواء لجمع المعلومات عن الجامعات مشان الفصل الشتوي ونبشت بمواقع اغلب الجامعات الغربية.. روابط الصفحات المهمة من مواقع كليات الطب البشري جمعتهم بهاد الملف (الأوراق المطلوبة لكل جامعة وبورتال التقديم).. اذا حدا بدو يقدم على كليات الطب(خاصة يلي بدها تقديم مباشر) بيلاقي أهم الروابط هون [ انظر الرابط المرفق ]

معدلي بالالماني 1.1 … ومع الاسف ما سمعت عن فحص TestAS إلا بعد ما كانت منتهية فترة التسجيل
قدمت على 20 كلية طب على الفصل الاول هالمرة
طبعا الكل اجاهم رفوضات بالجملة من اغلب الجامعات، وأغلبهم ذكروا بشكل صريح انه علامة البكالوريا غير كافية
بس الحمد لله اللي يسرلي قبول من جامعة Bochum وسجلت فيها .. وبعدها اجاني قبول من Ulm بال Nachverfahren .. بالنهاية القبول تيسير من الله
وعملت امتحان TestAS باكتوبر للاحتياط، حكيت عن هالتجربة ببوست سابق [ انظر الرابط المرفق ]

بدأت الدوام اخيرا بعد سنتين من الانقطاع، حاليا بالفصل الثاني ورابع جامعة بدرس فيها :D
…………….
على فكرة جامعة Bochum كانت آخر جامعة قدمت عليها! حتى اني للحظة فكرت ما قدم وقلت إلا ما يجيني كم قبول من هال 19 ... بس بعدين قدمت مشان ما اندم على شي ومشان كون أخذت بكل الأسباب المتاحة ... فالحمد لله

ملاحظة: يلي ناوي يدرس طب بشري وخلص لغة ولسا عنده وقت لبين ما يبلش دوام -طبعا أول شي لازم يعمله هو انه يخلص من 3 شهور براكتيكوم الرعاية- بس اذا زاد معه وقت وحب يطّلع على شي من الطب البشري بإمكانه يشتري سلسلة كتب Medi-learn لإحدى المواد ويقرأ فيها (ال Physiologie مثلا كتير ممتعة) الكتب حلوة وميسّرة للفهم وهي أحد مصادر الدراسة للفزيكوم.. بتلاقوها مستعملة بموقع [ انظر الرابط المرفق ] أو جديدة على أمازون، وانتبهوا لتاريخ الإصدار.. وإذا شي ما فهمه فيه يبحث عالنت أو عالموقع الشهير [ انظر الرابط المرفق ]
………….…

ختاماً: اذا عندك هدف ضل/ي وراه ولا توقف/لا توقفي ، حتى لو كانت الفرص محدودة وحتى لو تعرضت/ي لمتاعب وشنططة، طالما عم تبذل/ي جهدك ومتوكل/ة على رب العالمين فهو قادر ييسر لك الطريق مهما كان صعب عليك.. ولا تهتم/ي إطلاقا بفكرة انو راح عليك وقت.. سنتين الانقطاع ما بعتبرهم ضاعوا لأنه قرأت فيهم كتب وطورت نفسي واستفدت منهم ودائما بيقدر الواحد يستفيد من الوقت وما يضيع سنين عمره، والوقت يلي بيستفيد منه لا يزعل عليه .. خلي نيتك لله لحتى تاخد/ي ثواب على صبرك وكفاحك وحط/ي لنفسك هدف انك تساهم/ي بالنهضة :)

والحمد لله رب العالمين على كل نعمه

بالتوفيق للكل ولا تواخذونا عالإطالة، واللي استفاد يدعيلنا :)


تابعنا على ...                  
عن الموقع
من نحن؟
اتصل بنا
إتفاقية الإستخدام
سياسة النشر
Impressum
أقسام الموقع
اطبع سيرتك الذاتية
المبيت ليلة الإمتحان
كــنوز المعــلومات
الأسئلة القصيرة
في ألمانيا   |   إلى ألمانيا

أصدقاؤنا