|
29.05.2016
|
امتحان TestAS
| المشاهدات
1668
السنة
:
2015
المكان
:
داخل ألمانيا
المدينة
:
Berlin
على امل تستفيدوا من التجربة ونساعد يلي بعدنا متل ما ساعدونا يلي قبلنا
بداية انا طالب طب بجامعة Bochum قدمت فحص TestAS بالعلوم الطبيعية والرياضيات بتاريخ 10.10.2015 والحمد لله طلعت النسبة المئوية 99% بالفحص المركزي و 95% بالفحص التخصصي
فحص TestAS هو امتحان للذكاء والقدرات العقلية ومعالجة المعلومات، بيرفع معدل شهادة البكالوريا كتير وفي كتير جامعات بتاخد فيه وفي منهم بيشترطوه
إجراء الفحص هلأ صار ضروري بعد ما ارتفعت معدلات القبول (كمثال كليات الطب البشري صار معظمها ما يقبل أي حدا علامته بالبكالوريا تحت 1.0 وحتى يلي علامتهم 1.0 مو كلهم عم ينقبلوا)
الامتحان مكون من قسمين، الأول هو الفحص المركزي والكل بيعمله والثاني تخصصي بيفرق حسب التخصص اللي بتختاره من بين التخصصات الأربعة المتاحة
انا عملت الفحص باللغة الانكليزية بتخصص العلوم الطبيعية والرياضيات وهو التخصص المطلوب للي بدو يقدم على كليات الطب
----------
ملاحظات ونصائح للامتحان:
الفحص المركزي: هو فحص ذكاء وقدرات رياضية أساسية وربط منطقي، بيتطلب القدرة على أداء العمليات الرياضية الأساسية بشكل ممتاز وسريع جداً
وبيتطلب معرفة بالقوانين الرياضية الأساسية (مثل كيف تحسب مساحات الأشكال الهندسية المعروفة)
ما بيحتاج قوانين معقدة مثل التفاضل والتكامل وما إلى ذلك، باختصار معلومات الإعدادي الأساسية.. لكن صعوبة الامتحان تكمن في تطلّبه للقدرة على المعالجة والربط المنطقي وليست في حفظ المعلومات، إضافة لضيق الوقت الشديد
النموذج الرسمي تبع الفحص كتير ممتاز وكتير فادني .. قريته قبل الامتحان بيوم
في أسئلة ال Completing Patterns أو الشكل المفقود ممكن تلاقوا عالانترنت كتير تمارين خارجية عليها للتدريب، متل هاد كتير كويس [ انظر الرابط المرفق ] ، وأجوبته بتلاقوها عاليوتيوب [ انظر الرابط المرفق ] .. كتير بيشبه اسئلة الشكل المفقود بال TestAS.
ونصيحة تدربوا منيح على عمليات قـســمة الأرقام الصعبة بالفواصل بحيث تقدروا تعملوها بسرعة فائقة لأنو رح تحتاجوها بالمسائل.
-----
الفحص التخصصي بالعلوم الطبيعية والرياضيات: هو امتحان للقدرة على الاستنتاج ومعالجة المعلومات بالعلوم الطبيعية والرياضيات
كمعلومات دراسية بيعتمد على معلومات المرحلة الإعدادية لغاية الصف العاشر (حسب المناهج السورية)، يعني بيتطلب معلومات أساسية بالأحياء والفيزيا والكيميا
ولكن تركيز الامتحان هو على الامور التانية وليس على المعلومات نفسها، يعني على الاستنتاج والربط، قليل يجي سؤال عن معلومة بحد ذاتها، بس لازم يكون في قاعدة علمية أساسية مشان تقدر تبني الاستنتاج عليها، بيتطلب كمان قدرة على قراءة ال diagrams
انا نزّلت كتب الفيزيا والكيميا السورية من الانترنت وراجعتهم عالسريع قبل الفحص بيومين... الحمد لله عندي أساس قوي لهيك ما احتجت راجع كتير .. كل واحد بيقدّر قديش بيلزمه مراجعة
كمان النموذج الرسمي رائع وضروري جدا
نصف أسئلة الفحص هي عبارة عن خرائط انسياب/ Flussdiagramme /Flowcharts ، حاولوا تجيبوا تمارين خارجية عليها من النت مشان تتدربوا عليها
--------------
ملاحظات عامة:
-أسئلة النموذج الرسمي مماثلة بالصعوبة لأسئلة الامتحان
-الكتب تبع تحضير TestAS ما عندي اطلاع عليها
-الامتحان بيتطلب معرفة أساسية باللغة الانكليزية او الألمانية (حسب اللغة اللي بتختارها) يعني تكون بتعرف الكلمات العلمية الأساسية بهاللغة وعندك مستوى لغوي فوق الوسط بحيث تقرا الاسئلة بشكل سلس وما تتعطل ويروح عليك وقت
-فحص ال On-screen Test تبع اللغة ما بعرف شو فائدته بس اللغة المطلوبة فيه أصعب من اللغة المطلوبة للامتحان نفسه
-بنصح بحل النموذج الرسمي وقراءته كاملا قبل الامتحان بيوم واحد مشان تبقى الملاحظات اللي فيه عالقة بالذهن، والافضل من هيك حله قبل عدة ايام ثم حله من جديد قبل الامتحان بيوم
-الامتحان لقيته كتير حلو وأسئلته كلها أشبه بحزازير، محبي الحزازير والألغاز رح يستمتعوا فيه كتير :)
يلي استفاد يدعيلنا
وموفقين جميعا والله ييسر الأمور.. يا ميسّر :)
|
|