التجربة رقم 2 | كل التجارب

اضف تجربتك في..

ملاحظة:
لكي يتم نشر تجربتك لا بد أن تكون باللغة العربية, وتذكر كلما كانت الكتابة أقرب للفصحى كما كان شريحة المستفيدين منها أوسع.

في أي عام كانت تجربتك؟

تجربتك كانت في..

داخل ألمانيا

خارج ألمانيا

في أية مدينة كانت تجربتك؟

اختر باباً مناسباً لتجربتك مما يلي

اكتب عنواناً معبراً عن تجربتك

إضافة التجربة +

تجربتي الشائكة في الحصول على الفيزا الدراسية من السفارة الألمانية في بيروت

29.05.2016 | السفارة الألمانية | المشاهدات 3350

السنة : 2015
المكان : خارج ألمانيا
المدينة : بيروت

السلام عليكم ..
تجربتي شائكة قليلاً ..
3 أشهر انتظار موعد المقابلة ..
9 أشهر بين المقابلة واستلام الفيزا ..
بس لعل وعسى حدا يستفيد من الأخطاء يلي صارت معي .. والصدف يلي صارت ..واسف سلفا على الاطالة ..
رح أبدا بنفس الترتيب الزمني للأحداث :

أولاً : بعد التخرج كطبيب أسنان 2014 وتجهيز الأوراق والتصديق و و .. بلشت سنة 2015 .. قررت احجز موعد .. كانت سفارة بيروت عبتتاخر شهرين لتعطي موعد فحجزت بال I-Data في أنقره .. واجاني موعد بتاريخ 26-05-2015 ..
اعتبرته بعيد جدا .. حكيت مع أحمد حوري – دار العلوم .. والشباب ما قصروا خلال أسبوعين خبروني أنو حجزولي موعد ببيروت طبعاً .. بس الصدفة المزعجة جدا أنو كماااان الموعد انحجز بتاريخ 26-05-2015 !!! ولو بدي ياها قصدا ما بتجي ..
لغيت موعد تركيا وضليت على موعد بيروت ..

ثانياً: نويت أقدم فيزا هوسبيتاتسيون من عيادة 3 أشهر + كورس لغة مكثف من غوتيه 3 أشهر .. وأوراقي جاهزة .متل البوست باول كومنت ..
بالإضافة إلو شهادات خاصة فيني وورقة من استاذي الألماني اني دارس b1 وهي أول مصيبة رح أذكرها بعدين ..
. طلعت على بيروت وفتت ببطاقة نقابية كطبيب ..
مقابلتي كانت الساعة 12 ونص وما فوتوني لل 4 وتلت ..كالعادة ضغط شديد وما في تنظيم جيد ..
المقابلة كانت سلسلة جدا والموظفة متعاونة كتير وقالتلي ورقة مستوى اللغة من استاذي غير معترف فيها ويمكن تأثر ..

ثالثا: المصايب ..
بعد 5 أيام من المقابلة اتصلت الموظفة فيني وقالت أنو بالفعل ما رضيوا يعتبروا أني بمستوى B1 بدون شهادة ..
(بهديك الفترة ما كانت شائعة فكرة فحص تحديد المستوى والأغلبية بيعملوا فحص الZD ) ..
وخيرتني إما اقلبها فيزا لغة فقط بما اني جايب قبول لغة أو نتتظرني أعمل فحص اللغة و ينرفع ملفي مباشرة )
طلبت مهلة أسبوع وترجع تخبرني .. وبالفعل رجعت خبرتني بعد أسبوع وطلبت ينتظروا أني اعمل الفحص ..
لأنو فيزا اللغة كانت ضعيفة من حيث القبول ..
رجعوا خبروني بعد أسبوعين وما انتبهت علموبايل ونشفوا عيوني أحاول يعلق الخط معي وما يعلق !!!!
يمكن دقيت الف مرة بالنهار ..
وحظظت معي ورجعوا اتصلوا وقالتلي في مشكلة برسالة الدوافع أنا حاططها تحت مسمى StudiumVisum
وهاد شي غلط لأني مقدم غير نوع فيزا .. وبالفعل غيرت العنوان وشلت كل ما هو متعلق بالدراسة الجامعية من رسالة الدوافع
وبعتتها ..
حاولت اتواصل مع معهد غوتيه ببيروت لاعمل فحص تحديد مستوى (بهدف اجيب B1 ) واضمه لملفي ..
وكرهوني حياتي .. أحقر تعامل ممكن يتم .. تسبيح وكذب ..تسبيح وكذب ..
هالأسبوع في وهالأسبوع ما في.. وما منعرف امتى و و و
ضليت ملكوع شهرين كاملات بسببهن ..ولما قررت أقدم ZD كانوا مسددين وما في مواعيد لشهر 10-2015 ..
وبعدها يئست من لبنان وقررت اطلع اعمل الفحص بتركيا لأنو في 3 معاهد غوتيه ..
إسطنبول وانقرة وازمير ..
طلعت على تركيا ايد من ورا وايد من قدام . بدون حجز وبدون ما اتاكد إذا في فحص تحديد مستوى ولا لأ
.. ما بعرف أي شي .. بس قلت أكيد احسن من حقارة بيروت ..
وبالقعل الحمد لله من اول نهار تيسرت باسطنبول وعملت الفحص بنفس اليوم واخدت النتيجة B2 الحمد لله .
ونزلت عبيروت فورا .. هالحكي بشهر 09-2015 .. وكملت ملفي .. وطبعا اضطريت اجدد القبولات كلها لأنو راح تاريخها ..
هون كان صرلي تقريبا 4 اشهر مقابل وملكوع للأسف ..

رابعاً : تغيير السفير الألماني :
لما جبت B2 قلت لحالي بقلب الفيزا بحث عن عمل وباخدها بأسبوع وبخلص من هالمصايب ..
وعلى حظي بهي الفترة كان جاي سفير جديد عسفارة بيروت ورفض طلبي ..
وكنت امام خيارين إما أكمل بنفس الفيزا بما أنو اكتمل ملفي (بس بدي انتظر يطلع الملف لألمانيا ويرجع )
أو الغيه واقدم موعد جديد ببحث عن عمل لأنو محقق الشروط ..
بس قررت أضل على نفس نوع الفيزا ..
وبالفعل بعد 3 أيام بتتصل فيني الموظفة وقالتلي ملفك طلع لألمانيا ..

خامساً : الضياع :
وانشغلت بفحص الماجستير والعيد و و و وما اجت الفيزا لسا !!
يا جماعة .. يا سفارة .. شو الوضع ! لاحياة لمن تنادي ..
أحاول اتصل ما يعلق ..
ولما يعلق ما يردوا الاكابر ..
الشباب بألمانيا سألوا بدائرة الأجانب بألمانيا ويجاوبوا أنو الملف قيد الدراسة لسا ..
وأنا خلصت أول سنة ماجستير وبلشت بالتانية ..
وببداية 11-2015 اجاني تلفون من السفارة أنو تم الموافقة على فيزا 6 اشهر ..
وللمرة التانية جددت القبولات وفورا تاني نهار نزلت عبيروت ..
وسلمت جوازي عشباك رقم 1 .. وقلي رجاع الساعة 3 متل الكل .. ولما رجعلي الجواز :
((قلي ما في فيزا !! لسا ما وصل شي ))
انا هون الشياطين السود والقرود عبتنط قدامي .. وللأسف في بلور بيني وبين الموظف اللذيذ عشباك رقم 1 ..
من غضبي رجعت بنفس الليلة على حلب ..
وقلت بدي اصبر اسبوع أسبوعين ..
بعتت ورقة المقابلة وصور جواز مع قرايبي لحتى يستلم الجواز ويستفسر .. رفضوا
قال ممنوع إلا بوكالة !! أو انا اجي شخصي ..
طبعا واضح انو في شي غلط وتعجيز الموضوع ..
وبلشت سنة 2016 .. وبالشهر الأول
رجعوا الشباب سألوا بدائرة الأجانب وراسلناهن بالايميل :
موظفة دائرة الأجانب قالت لصديقي انو في شي غريب أني انا مقدم طلبين فيزا بنفس الوقت ..
فيزا بحث عن عمل ... وفيزا ستاج ولغة !
وما عرفت تتصرف او تعطيه جواب
وبعد مرة تانية حولوه لمديرة معينة ..
وبعد عدة مرات تواصل
بعتولي دائرة الأجانب أنو نحن بعتنا لسفارة بيروت قرار بمنحك فيزا بحث عن عمل بتاريخ 06-11-2015 ..
وأني لازم اتابع فورا اموري مع بيروت ...دون باقي التفاصيل ..
طبعت هالايميل ورجعت نزلت مباشرة على السفارة ببيروت يا قاتل يا مقتول
عملت لبكة وحوصة طويلة لحتى فتت لجوا علسفارة ..
وفتت وفرجيتهن الايميلات بيني وبين دائرة الاجانب
الموظفة اخدت الايميلات المطبوعة وراحت للسفير ورجعت ..

)))))الخلاصة )))) :
1- السفارة ضيعوا ملفي كاملاً وخاصة لما تبدل السفير بشهر 9 .ولولا كرم رب العالمين وأنو الموظفة بنت حلال وخدمتني جدا لما اخدت الفيزا.
2- اول فيزا اجتني الموافقة عليها كانت بتاريخ شهر 09-2015 بس ما خبروني عليها لأنو ملفي ضايع ..(فيزا الستاج).
3- بتاريخ 06-11-2015 بتجيني تانية فيزا باسمي من المانيا (بحث عن عمل ) ..
4- السفارة ببيروت بخبروني بشهر 11-2015 استلم الفيزا .. ولما حطيت الجواز للاستلام ما عرفوا أي فيزا يعطوني وقالولي راجعنا بعدين !!!!
5- يلي تدارك الموقف أخيرا هي نفس موظفتي .. لما رحت بشباط 2016 علسفارة طلبت مني ارجع اجيب كل شهاداتي وقالتلي حيلا شي المهم نعمل ملف صغير إلك عنا ..
6- جدد قبولاتي 4 مرات وجن مني صاحب القبولات بالأخير طلعت بغير نوع فيزا تماما ..
نصائح من تجربتي :
1- أوعى توقف حياتك ببلدك وانت عبتنتظر الفيزا .. انا خلصت سنة ماستر جراحة فكية وجهية بالجامعة بحلب .. وبلشت بالسنة التانية وبنص السنة سافرت ..
2- اللغة ثم اللغة ثم اللغة ثم اللغة ثم اللغة .. اكتر شغلة ندمان عليها انا أني انقطعت عن دراسة الألماني 6 اشهر ..
انا حاليا بألمانيا ومقهور على هديك الفترة . بختلف حياتك تماما لما بتوصل لهون وانت قد حالك باللغة وحتى لو عبتدرس لحالك..
بتقدر تتمكن ..
3-فيزا البحث عن عمل شبه مضمونة بإذن الله وهاد بوست بتتعرفوا على أنواع الفيزا
4- انا سافرت عبر الخطوط الجوية المصرية .. المميز فيها انو بتسمحلك بوزن 46 كيلو + 8 هاند باغ .. وممكن تشتري حقيبة تالتة بسعر 150 دولار يعني 69 كيلو تحت + 8 هاند باغ ..
ما عدا الوزن التهريب يلي بتقدر تطالعه (انا طالعت 102 كيلو )
5- كنت دائما احتفظ بملفاتي وشهاداتي بعدة أماكن واكتر من نسخة .. وهالشي ساعدني لما ساعدتني الموظفة وطلبت ارجع اجيب كل شهاداتي كنت رح اتعذب وانزل لحلب وارجع اطلع لبيروت وممكن تضيع فرصة التساهل من السفير .. طبعا الأفضل من هاد كلو اسحبوها سكنر وارفعوها على دربوكس او غوغل درايف ..
6- صعب جدا تتابع حالة الملف الخاص فيك عن طريق الاتصال بالسفارة ..
إما ايميلات وإذا ما جاوبوا روح انزل شخصياً وتابع موضوعك ((ماحك جلدك مثل ظفرك )) .. وممكن رفقاتك بألمانيا يساعدوك ويسألولوك دائرة الأجانب بالمدينة يلي مقدم عليها عن ملفك ..